Ilay fitiavako anao
Sarotra amiko ny hangina,
Fa manosika ahy ny foko
Fa feno loatra tsy hay laniana
‘lay fitia toa tsara loko.
Koa indro atolotro anao
Fitia madio sy manonja,
Omeko manontolo ho anao
Fitia mivolo-diamondra.
F’iray tsy manan-tsahala
‘zany hatsaran’ilay fitiavako,
Ho anao irery ry malala
Vady tiako sy fiainako.
Tsy mba fitia misalasala
Ka hamela anao ho irery,
Fa ho feno hatrany hafanana
Ravaha-tsiokam-borokely.
Fa toy ny raozy vao misokatra
Mamerovero an-jaridaina,
Ho toy ‘lay masoandro vao miposaka
Amin’ny andro vao maraina
Raha mbola velona ny aiko
Raha mbola tany koa ny tany,
Na ho osa aho na hijaiko
Ilay fitia hitombo hatrany.
Ny fitiavako anao ry Johary
Dia lalim-paka tsy hay bikaina,
Satria ‘lay Andriananahary
No nametraka azy ho AINA.